De Amigoe behoudt zich het recht voor ingezonden brieven te weigeren, te corrigeren of anderzins redactioneel te bewerken en in te korten. Brieven, die maximaal 600 woorden mogen bevatten, moeten zijn voorzien van naam en woonplaats. Het adres en telefoonnummer worden niet gepubliceerd, maar zijn nodig ter verificatie. Gelieve brieven te sturen naar redactie@amigoe.com.

Home Ingezonden Ingezonden IN MEMORIAM SR. MIGUEL POURIER
IN MEMORIAM SR. MIGUEL POURIER PDF Afdrukken E-mail
dinsdag, 26 maart 2013 08:24

RIBA DJADUMINGU di Rama, selebrashon di komienso di Siman Santu, nos a risibí e notisia di fayesimentu di nos miembro fiel di Iglesia, konsehero di nos diósesis i miembro di nos Fundashon di Biennan Inmóbil di obispado, sr. Miguel Pourier.

Un persona ku tabata konosé i biba prinsipionan di Iglesia, un persona ku un fe grandi ku el a demostrá ku su bida den su parokia i ku e trabounan ku el a ehersé pa nos obispado.

Semper kla pa koperá, semper kla pa duna un kontribushon ku su análisis, ku su palabranan di inspirashon i di animo pa aportá na bienestar di hinter diósesis.

Hopi ta nos hendenan ku den tur e enkuentronan i reunionnan, e por a duna algu di su kalor, ku e atenshon ku e tabata tin pa esnan rondó di dje i tabata traha kuné. Nunka el a lubidá di informá na e situashon personal di un amigu, konosí òf kolaborador. Su motivashon enorme, tabata funda den su interes grandi pa bienestar di nos Iglesia i spesialmente pa mantenshon i restourashon di nos edifisionan pa protehá patrimonio di nos Iglesia, pero tambe di nos komunidat en general. Komo miembro di nos Fundashon di Biennan Inmóbil i presidente di komishon pa rekoudá fondonan pa e meta aki, el a kontribuí intensivamente. Tur esaki for di su vishon di importansha di Iglesia pa bienestar spiritual i temporal di tur hende.

Maske su edat a subi i su salu tin bes tabata strob’é de bes en kuando, su kontribushon a keda konsistente te na delaster lunanan. Ku un grado haltu di responsabilidat, ku su karakter di persona di palabra, el a kontribuí na tur momento ku su konosementu, su eksperensia i su kontaktonan.

Lo e keda ku gratitut den nos memoria i pensamentunan. Nos ta kombensí ku lo e sigui duna nos un man for di su lugá serka Dios Tata.

Pasobra ta ku un fe grandi i speransa firme nos ta kere ku awor aki Dios a tum’é den Su reino pa e por sosegá na pas pa tur loke el a hasi pa Su Iglesia aki na mundu.

 

Mgr. Luis A. Secco, SDB

Curaçao